DKT. KIKWETE ATAKA CHUO CHA MAJI KUANDAA MITAALA ITAKAYOSAIDIA WAHITIMU KUAJIRIKA.

 

NA MAGENDELA HAMISI

CHUO cha Maji kimetakiwa kuandaa mitaala inayofanikisha wahitimu kupata kazi popote duniani na kuwa na ufanisi sawa kulingana na mahitaji ya soko la ajira kimataifa na si kujifungia kwa soko la ndani pekee.

Hayo yamebainishwa leo Januari 31, 2024 na Rais Mstaafu wa Jamhuri ya Muungano wa Tanzania wa Awamu ya Nne, Dkt. Jakaya Mrisho Kikwete wakati akifungua maadhimisho ya miaka 50 ya chuo hicho yanayofikia tamati Februari 2, mwaka huu jijini Dar es Salaam.

“Nashukuru kuona kwamba mnaushirikiano na vyuo ndani na nje ya nchi hiyo inasaidia kuimarika katika utoaji wa kozi na wahitimu wanakuwa na soko la ajira popote duniani na si kujifungia kibongobongo.

“Moja ya changamoto kubwa katika vyuo vyetu ni kutoa elimu ambayo soko la ajira aihitaji na kusababisha kuwa na mkusanyika wa watu wanaonung’unika kwamba wao wana digrii lakini kazi hamna na kusema hii nchi gani?.

“Ukimuuliza umesomea nini, akikwambia unamuuliza hicho ulichosomea kama ni ajira anakuajili nani,? nani anayekuhtaji elimu yako,? unakuta hakuna ila amepata sifa kuwa na digrii ambayo haimsadii, hivyo hakikisheni mitaala yenu inatengeneza watu wanaohitajika katika soko la ajira,” amesema.  

Pia amekitaka chuo hicho kutumia fedha vizuri wanazopewa na Serikali kwa malengo husika ikiwemo kukamilisha miradi ya maji na kuimarisha upatikanaji wa maji nchini.

Amesema Rais Dkt. Samia Suluhu Hassan amejitahidi kuhakikisha kuwa anatekeleza kauli yake ya kumtua Mama Ndoo kichwani kwa Serikali kutekeleza miradi mingi ya maji.

“Niliwahi kuwa Waziri wa Maji kwa kipindi cha miaka mitano lakini halikuwa ili ngumu kutokana na kwamba hakukuwa na bajeti ya kutosha katika sekta hii kulingana na uchumi wetu na baadhi ya wahisani walisitisha kutupa misaada lakini sasa hali ni shwari, tumieni vuzuri fedha hizo,” amesisitiza.

 

Aidha Dkt Kikwete amekipongeza Chuo cha Maji kwa kuwa na Mfumo wa elimu ambao unawezesha wahitimu wake kujiajiri au kuajiriwa kwa urahisi zaidi.

“Mfumo wenu wa elimu mnaotumia yaani Competence Based Approach umesaidia kufanya wahitimu wa Chuo cha Maji kuweza kujiajiri au kuajiriwa kwa urahisi zaidi hivyo endeleeni kuboresha mazingira ya kufundishia na kufundisha ili wahitimu waweze kufanya kazi kwa ushindani zaidi ndani na nje ya nchi” Amesema Dkt. Kikwete.

Naye Mkuu wa Chuo hicho, Dkt. Adam Karia, ameishukuru Serikali kwa kuendelea kutenga fedha ili chuo kiwezesha kufanya maboresho mbalimbali na kuleta ufanisi wenye tija