SERIKALI KUTOA VIWANJA 21 KWA WAATHIRIKA WA MAPOROMOKO ITEZI - DKT. TULIA

NA MWANDISHI WETU, MBEYA

SERIKALI imepanga kutoa viwanja 21 kwa waathirika wa maporomoko ya tope  katika Mlima Kawetere,  Itezi jijini Mbeya, huku zaidi ya vifaa na vyakula vyenye thamani ya Shilingi Milioni 40 vikitolewa kuanziaAprili, 14, 2024 maafa hayo yalipotokea hadi sasa.

Akizungumza wakati wa kukabidhi vifaa kwa ajili ya waathirika, Mbunge wa  Jimbo la Mbeya Mjini ambaye pia ni  Spika wa Bunge la Jamhuri ya Muungano wa Tanzania na Rais wa Umoja wa Mabunge Duniani(IPU), Dkt. Tulia Ackson ametoa pole kwa wahusika na kumshukuru Mhe. Rais Dkt. Samia Suluhu Hassan kwa misaada ya chakula, magodoro, fedha taslimu na  viwanja.

Aidha Dkt. Tulia amewaomba wadau wengine watakaoguswa na jambo hili kuchangia vifaa vya ujenzi ili kufanikisha kupatikana kwa sehemu ya kujihifadhi waathirika hao, baada ya   nyumba zao kufukiwa na tope.

Kwa upande wake, William Lukuvi  akiwakilisha ujumbe kutoka Ofisi ya Rais amesema kuwa  Mhe. Rais ameguswa na kila eneo  lililokumbwa na maafa hapa nchini na bado ataendelea kutoa msaada kwa waathirika

Mkuu wa Mkoa wa Mbeya, Juma Homera amekiri kupokea maelekezo kutoka kwa  Mhe. Rais na kuahidi kutoa viwanja sehemu nzuri na utekelezaji utaanza mara moja.

Mhe. Dkt. Tulia amefika Itezi leo tarehe 21 Aprili, 2024  na kuzungumza na wahanga pamoja na kutembelea eneo ulipotokea mmomonyoko wa tope  katika   mlima Kawetere.