EACOP YAZINDUA PROGRAM YA MAENDELEO YA BIASHARA KUSAIDIA KAYA ZILIZOGUSWA NA MRADI

Bomba la Mafuta la mradi wa EACOP

NA MWANDISHI WETU

MRADI wa Bomba la  Kusafirisha Mafuta Ghafi la Afrika ya Mashariki  ( EACOP)  umeanzisha programu ya kuzisaidia kaya ambazo  ardhi yao limepita bomba la mradi huu lengo la programu hii ni kuziwezesha kaya kujiendeleza kiuchumi.

Meneja wa Kitengo cha Ardhi na Ushirikishwaji wa jamii cha EACOP (Tanzania) Jean Lennock amesema kuwa lengo la mpango huu wakuzisaidia kaya hizo ni kuondoa changamoto ambazo kaya hizo inakumbana nazo baada ya mradi kuzihamisha kaya hizo kutoka kwenye ardhi yao.  

"Nia ya mpango huu kuziwezesha kaya hizi kupata ujuzi na maarifa ya kuchangamkia fursa za biashara na kukuza biashara za kaya hizo katika maeneo yao," amesema.

Amesema kuwa katika kufanikisha shabaha hii, EACOP imeandaa programu nane ambazo zitazisaidia kaya hizo kurejea katika maisha yao ya awali.

Ndani ya programu hizo,  shughuli nane za kurejesha maisha ya kaya hizo zimebainishwa katika maeneo yaliyoathiriwa na mradi.

Shughuli hizi ni pamoja na kupewa elimu ya upandaji wa mazao ya kilimo kama vile mahindi,  ufugaji wa kuku, programu ya ufugaji bora wa wanyama,  maboresho ya ufugaji wa nyuki,  maendeleo ya biashara na mafunzo ya bajeti ya kaya na usimamizi wa fedha .

Amesema kuwa EACOP hivi karibuni imezindua utekelezaji wa program ya Maendeleo ya biashara.   Awamu ya majaribio kwa programu ya maendeleo ya biashara itakuwa katika Mkoa wa Kagera (hususani Wilaya za Misenyi na Muleba).

Awamu hii ya majaribio inalenga kaya 798 zilizoathiriwa (64 zikiwa zile ambazo zimeathiriwa maeneo yao kwaajili ya ujenzi wa Kambi na vituo vya kutunzia mabombana 734 ni zile ambazo zimeathiriwa ardhi yao kwenye mkuza wa bomba la mafuta).

Lennock amesema lengo kuu ni kuzisaidia na kuzijengea uwezo  kaya 8,971 katika eneo la maendeleo ya biashara. Lengo  hili pia linalenga maeneo 453 ya kipaumbele ya kaya 8,518 zilizo kando ya mkuza wa bomba la mafuta katika mikoa minane nchini Tanzania ambayo ni Kagera, Geita, Shinyanga, Tabora, Singida, Dodoma, Manyara naTanga.

Programu hii imebeba shabaha nyingine kubwa ambayo ni kufanya tathimini kamili ya uwezo na mahitaji ya kaya zilizoathiriwa, kushughulikia changamoto zilizozuia kaya hizo kusonga mbele kibiashara katika maeneo yao ya awali kabla hayajachukuliwa na mradi.

Amebainisha kuwa lengo ni kuziwezesha kaya zilizoathiriwa kusimamia mikakati yao ya maisha katika maeneo  kama biashara ilikuwa na ukuaji endelevu wa kiuchumi.

Utekelezaji wa mpango huu ni kuhakikisha manufaa na thamani  ya shughuli kubwa za maisha  ya kila siku ya kaya husika zinakuwa endelevu.

EACOP Ltd ni kampuni yenye madhumuni maalum, inayosimamiwa na Mkataba wa Wanahisa wake ambapo wanahisa ni  TotalEnergies asilimia 62, Uganda National Oil Company (UNOC - asilimia 15 Shirika la Maendeleo  ya Mafuta ya Petroli la Tanzania (TPDC), asilimia  15 na CNOOC asilimia 8.