SIKU YA UTALII DUNIANI; WONDERS ARE CALLING

NA MWANDISHI WETU, KARATU

Mkuu wa Wilaya ya Karatu, Dkt. Lameck Karanga, ameipongeza Mamlaka ya Hifadhi ya Ngorongoro (NCAA) kufuatia jitihada zinazofanywa na Mamlaka hiyo kutumia teknolojia za kidijitali kutangaza maajabu ya vivutio vya utalii vilivyopo Ngorongoro ambapo matumizi ya  teknolojia hiyo yanasaidia kuwaita watalii mbalimbali duniani.

Dkt. Karanga alitoa pongezi hiyo  tarehe 27 Septemba, 2026, wakati wa maadhimisho ya Siku ya Utalii Duniani yaliyofanyika  katika jengo la Makumbusho ya  Urithi Geopark, Wilayani Karatu  mkoani Arusha yakiongozwa na kauli mbiu isemayo  “ Ajenda ya Kidijitali na Akili Bandia katika Kubuni upya Utalii,”

Mhe. Karanga ameongeza kuwa  matumizi ya teknolojia katika utalii yamekuwa muhimu katika kuwafikia watalii kwa urahisi zaidi, hususan katika kipindi ambacho teknolojia imekuwa sehemu ya maisha ya kila siku. 

“Tunapoadhimisha siku hii tumepata nafasi ya kujionea jinsi ambavyo Ngorongoro mnatumia  teknolojia kutangaza vivutio vya utalii, pamoja na vitu vingine tumeona matumizi ya QR codes kupata taarifa za vivutio vya utalii, tumeona  matumizi ya Visual reality ambayo ni  jitihada kubwa ya mapinduzi ya kutangaza utalii kisasa” ,alisema Dk. Karanga 

Naibu Kamishna wa Uhifadhi wa NCAA Joas Makwati, amebainisha kuwa  Ngorongoro inaendelea kuimarisha matumizi ya teknolojia za kidijitali katika kutangaza utalii wa wanyamapori, malikale, urithi wa utamaduni, jiolojia, kuibua mazao mapya ya utalii sambamba na  kuboresha huduma kwa wateja kupitia miumo wa kisasa  wa malipo  na kuingia na kutoka ndani ya hifadhi wa Vipenyo Smart Gates (VGS).

Ngorongoro imefanya maadhimisho hayo kwa kushirikisha wadau kufanya mbio fupi (Fun Run) na michezo kwa lengo la kuhamasisha jamii kushiriki katika shughuli za utalii na michezo, pamoja na kuelimisha kuhusu umuhimu wa utalii katika kuchochea maendeleo ya jamii.