TAKUKURU PWANI YAFANYA UTAFITI KUDHIBITI RUSHWA BARABARANI

N

A MWANDISHI WETU PWANI

 

TAASISI ya Kuzuia na Kupambana na Rushwa, (TAKUKURU) mkoani Pwani inatarajia kukamilisha utafiti mdogo wa kubaini vyanzo vya vitendo vya rushwa vinavyohusisha baadhi ya askari wa Usalama Barabarani na wataikabidhi kwa Jeshi la Polisi ili kutoa suluhisho ya changamoto hiyo.

 

Hayo yamewekwa wazi leo mkoani Pwani, Januari 20, 2025 na Mkuu wa Takukuru Mkoa wa Pwani, Christopher Mzava wakati akizungumza na waandishi wa habari na kuongeza kuwa utafiti huo upo katika hatua za mwisho kukamilika.

 

“Sisi kama Takukuru wakati mwingine tunafanya uchunguzi, kama utafiti kutaka kuangalia tatizo lina ukubwa gani na hatua za kuchukua, hivyo katika kipindi cha kuelekea sikukuu za mwisho wa mwaka na kabla tulifanya utafiti mdogo kuhakikisha tunapata taarifa sahihi za usalama barabarani.

 

“Na sasa tupo katika hatua ya kukamilisha na tutaipeleka kwa wenzetu Jeshi la Polisi kwa lengo la kuangalia wapi mapungufu yalipo na nani anajihusisha na vitendo vya rushwa, kwani siku zote rushwa haizuiwi na mtu mmoja, inatakiwa uwepo wa ushirikiano wa taasisi mbalimbali na ndiyo hali inayoweza kufanikisha mapambano dhidi ya rushwa,” amesema.

 

Amesema utafiti huo utawasaidia wao Takukuru na Jeshi la Polisi kufanikisha kudhibiti vitendo vya rushwa vinavyolalamikiwa na wananchi hasa wanaotumia vyombo vya usafiri ingawa inafahamika kuwa rushwa ni siri kati ya mtu na mtu na inawezekana wakati mwingine baadhi ya wenye vyombo nao wakawa chanzo kwa kushawishi.

 

“Pia hata baadhi ya watu wetu ambao si waadilifu nao wanaweza kuwa vishawishi katika vitendo vya rushwa hivyo vitendo vya rushwa vipo na sio kwamba havipo kwa sababu ni vitu ambavyo vinalalamikiwa.

 

“Mfano juzi kuna baadhi ambao wameonekana kupitia picha za video kama ambayo wengi mmeona na tayari hatua zimechukuliwa,” amesema. 

 

Ameongeza kuwa awali kulikuwa na ushirikiano kati ya Polisi, Takukuru na Wadau uliokuwa unaitwa (UTATU) na lengo lilikuwa ni kuhakikisha vitendo vya rushwa barabarani vinatoweka.

 

Amesema kuwa kulikuwa na App iliyokuwa inatumika  na wadau mbalimbali kurekodi vitendo vya rushwa vikiwa vinaendelea na baadaye kutuma bila kujulikana kwenda kwenye taasisi husika na kuchakatwa na hatua kuchukuliwa.

 

Kamanda Mzava ameongeza kuwa kwa sasa App hiyo inaonekana kama kulegalega na wao kama Takukuru wanawajibu wa kuhakikisha vitendo vya rushwa vinakoma na kuiweka nchi salama kutokana na kwamba Tanzania bila ya vitendo vya rushwa inawezekana.

 

 

 

Mwisho