MRADI WA UMEMEJUA KISHAPU KULETA MAPINDUZI MAKUBWA SEKTA YA NISHATI NA KIUCHUMI NCHINI - NAIBU WAZIRI SALOME

NA MWANDISHI WETU, SHINYANGA

NAIBU Waziri wa Nishati, Salome Makamba, amesema mradi wa umemejua unaotekelezwa wilayani kishapu mkoani Shinyanga utaleta mapinduzi makubwa kwenye sekta ya nishati na kiuchumi kutokana na kutoa mchango mkubwa wa upatikanaji wa umeme wa uhakika utakaoingizwa kwenye gridi ya Taifa.

 Ameyasema hayo leo  Januari 9, 2026 akiwa mkoani Shinyanga mara baada ya kutembelea mradi wa umemejua wa kishapu pamoja na ule wa upanuzi wa kituo cha kupoza umeme cha  Ibadakuli sambamba na njia ya kusafirisha umeme kutoka Ibadakuli-Simiyu.

Amesema huu ni muendelezo wa jitihada za Serikali kupitia Mhe Rais Dkt Samia Suluhu Hassan kuhakikisha wananchi wananufaika na miradi inayotekelezwa na Serikali hususani ya umeme.

Kuhusu mradi wa upanuzi wa kituo cha kupoza umeme cha Ibadakuli na ujenzi wa njia ya kusafirisha umeme Mhe.Salome amesema umeme utakaozalishwa utawanufaisha wananchi wote wa Tanzania na kuleta mapinduzi kwani sekta ya umeme inawagusa mwananchi mmojammoja.

Akizungumzia maendeleo ya mradi huo, Meneja mradi wa Kishapu Mha.Emanuel Anderson amesema, mpaka sasa mradi umefikia zaidi ya asilimia 89 na unahusisha ujenzi wa paneli elfu 82 zenye uwezo wa Wati 605 kika moja zitakazozalisha megawati 50 za awali kwa awamu ya kwanza

Amesema mradi wa umemejua kishapu utakuwa wa manufaa makubwa kutokana na umuhimu wake kwenye utunzaji wa mazingira unaoepuka uzalishaji wa hewa ya ukaa na umeajiri Watanzania wengi kwa kipindi chote cha utekelezaji wake.

Akitoa tathmini ya ujenzi wa upanuzi wa kituo cha kupoza umeme Kaimu Mkurugenzi wa Miradi ya umeme TANESCO makao Makuu Mha. Frank Mashalo amesema miradi hiyo inahusisha uongezaji na uwekaji wa Transfoma yenye uwezo wa MVA 780 ili kuimarisha hali ya upatikanaji wa umeme kwa wananchi wa Mkoa wa Shinyanga na Mikoa jirani.

Aidha ameeleza kuwa miradi hiyo inatekelezwa na  Mkandarasi Sieyuan Electric kutoka China na Kalpataru kutoka India  anayetekeleza mradi wa njia ya kusafirisha umeme kutoka Shinyanga hadi Simiyu.

Awali kabla ya kuanza ziara yake, Naibu Waziri, Salome na ujumbe wake walipata fursa ya kumtembelea Mkuu wa Mkoa wa Shinyanga Mboni Mhita ambaye alimshukuru, Salome kwa kazi nzuri anayoifanya kutembelea miradi inayotekelezwa na Wizara ya nishati chini ya taasisi zake.

Miradi yote ya upanuzi wa kituo cha kupoza umeme njia ya kusafirisha umeme kutoka Shinyanga hadi Simiyu na ule wa umemejua wa kishapu imegharamiwa na Serikali ya Jamhuri ya Muungano wa Tanzania kwa asilimia mia moja.