BARAZA KUU LA UONGOZI CUF LATOA MAAGIZO KWA WATENDAJI WAKE

NA MWANDISHI WETU

BARAZA Kuu la Uongozi la Taifa (BKUT) la CUF- Chama Cha Wananchi, limetoa maagizo kwa Katibu Mkuu na Manaibu wake kuendeleza kazi ya kukamilisha Ilani ya Uchaguzi wa Tanzania Bara na Zanzibar itakayozingatia maoni ya Haki Sawa na Furaha kwa Wote ambayo yameingizwa katika Dira ya Taifa 2050.

Maoni pia yanajikita Kuunda Serikali ya Umoja wa Kitaifa itakayokamilisha upatikanaji wa Katiba Mpya yenye misingi imara ya demokrasia inayotokana na maoni ya wananchi.

Hayo yamebainishwa leo na Mwenyekiti wa chama hicho Taifa, Profesa Ibrahim Lipumba wakati akitoa taarifa ya Baraza Kuu la Uongozi, kilichofanyika jijini Dar es Salaam Jan 8 hadi 9, 2025 ambapo pia amewataka wajumbe wa baraza hilo kwenda kusimamia rasilimali za nchi ili ziweze kuwa na manufaa na wananchi wote.

"Wajumbe wa Baraza Kuu ndio viongozi wa kusimamia sera ya CUF ya haki sawa na furaha kwa wote, hivyo nawaomba wakati tukiunda kamati ya kuandaa Ilani muipe ushirikiano wa hali na mali ikiwa kuhakikisha ilani yetu inakuwa bora," amesema.

 

Lipumba amesema CUF ndio chama kinaweza kuleta mabadiliko chanya kwa nchi na jamii, hivyo ni vema ilani yao ikidhi vigezo muhimu katika kuleta mabadiliko.

 

Amesema katika uandaaji wa ilani hiyo watatumia ilani iliyopita kuangalia yale ambayo yanapaswa kuingizwa nkwa kuongoza nguvu kazi ya kusimamia rasilimali .

 

Aidha aliwataka wajumbe hao wa Baraza Kuu kuhakikisha wanatoa elimu na kuhamasisha wananchi umuhimu wa kupata Katiba Mpya ambayo itagusa mahitaji ya wananchi.

 

"Napenda kutumia nafasi hii ya kikao cha Baraza Kuu la chama kuomba kila mmoja ashiriki kikamilifu katika kuhakikisha Ilani ya CUF 2025 inakuwa yenye ubora, lakini kubwa zaidi nawaomba tupiganie Katiba mpya kwani ndio inaweza kuondoa changamoto zote ambazo zipo nchjni ikiwemo uchaguzi," amesema.

 

Mwenyekiti huyo amesema chama chao kinatarajia kuja na ilani ambayo itaunganisha wananchi na viongozi wake ili kuchochea maendeleo.

 

Lipumba amesema Uchaguzi wa Serikali za Mitaa umeonesha namna ambavyo Katiba ya sasa inavyochangia kuzuia haki za wananchi kuchagua, hivyo ni wakati muafaka kwa kila mpenda haki sawa na furaha kwa wote kushiriki kudai Katiba Mpya.

 

Mwenyekiti huyo ameweka wazi iwapo wananchi watawapa ridhaa ya kuingoza Tanzania 2025 watahakikisha kunakuwa na Serikali ya Umoja wa Kitaifa kwa vyama vyote kushiriki kuunda Serikali.

 

 

Amesema hali ya maisha kwa sasa ni ngumu jambo ambalo linapelekea vijana wengi kuonekana wazee, hivyo kuishauri serikali kuwekeza kwa vijana.

 

Lipumba amesema sekta ya elimu nayo imekuwa haina faida kwa vijana kwani bado ipo katika misingi ya kizamani jambo ambalo linatakiwa kuangaliwa upya.

 

Kwa upande mwingine Lipumba ameitaka serikali iboreshe sekta afya hasa katika eneo la mama wajawazito na watoto kwani takwimu zinaonesha bado vifo ni vingi.

 

Amesema iwapo Serikali itatumia rasilimali misitu, wanyama, ardhi, madini na nyingine Tanzania itapata maendeleo ya haraka.

 

Aidha ameitaka Serikali kuwekeza kwenye viwanda ili kuweza kulisha nchi jirani na kuongeza ajira.

 

Katika kikao hicho Husna Mohamed Abdallah, amechaguliwa kuwa Katibu Mkuu mpya akichukua nafasi iliyoachwa na Hamad Masoud Hamad ambaye hakugombea kutokana na kukosa sifa.

 

Pia kikao kimemchagua Magdalena Sakaya kuwa Naibu Katibu Mkuu Tanzania Barana Alli Khamis akichaguliwa kuwa Naibu Katibu Mkuu, Zanzibar.